Зидан: Што ако ни се падне Ливерпул? Ќе ги елиминираме!

Учесниците во нокаут фазата од Лигата на шампионите се познати, а ждребот ќе биде одржан на 16. декември.

Реал Мадрид во групата А заврши зад ПСЖ па поради тоа можеме да очекуваме некој спектакуларен судир уште во осминафиналето.

Потенцијален противник на Реал е и актуелниот шампион на Европа, Ливерпул, но Зидан не се плаши од англискиот тим.

После победата над Клуб Бриж (1:3) францускиот стратег самоуверено порача дека ако им се падне Ливерпул ќе го елиминираат.

„Ако играме против Ливерпул ќе ги победиме и ќе ги елиминираме. Ние на ждребот не можеме да влијаеме, наше е да играме“, изјави Зидан.

Минатата година Реал во Лигата на шампионите беше елиминиран од Ајакс кој оваа сезона не обезбеди место во топ 16.