Денот кога Суарез се „претвори“ во голман (ВИДЕО)

Се играше 121. минута од четвртфиналето на Светското првенство во Јужна Африка.

На денешен ден пред точно десет години Уругвај и Гана играа продолженија, а афричката репрезентација имаше опасен слободен удар од десната страна. Паинтсил нафрли, а во големата гужва во шеснаесетникот Луис Суарез прво ја изблокира топката со нога, топката се одби до Адијах кој шутираше со глава. Тогаш Суарез се „претвори“ во голман и со рака го одбрани ударот.

Нормално, главниот судија на натпреварот досуди пенал и му покажа црвен картон на Суарез. Сите ја видоа веќе Гана во полуфиналето, Асамоа Гјан требаше „само“ да го реализира пеналот.

Што се случи понатаму знаете…Гјан ја погоди пречката и Уругвај со паненката на Абреу го реши пеналот рулетот и се пласираше во полуфиналето.

На крајот Суарез од човек кој изгледаше како трагичар во прв момент стана херој на Уругвај во овој натпревар.